在香港為子女選學校，確實辛苦。多謝司徒華嘅爭取，香港廢除小學升中試，學生分區選校，難以跨區，橫頭磡小販之子，再難憑升中試成績升入銅鑼灣區皇仁中學，於是被逼留在九龍校區。三十年之後，家長學生都縱壞咗，係唔肯俾子女跨區上課，堅持原區入學，令到選校有時變成選居住地址，家長出盡辦法要搵個九龍塘地址，麥當勞道地址。隨着香港人口出生率下降，家計會工作由防止添丁變成防止性病，人口老化，小孩日少，原區升學演變成學生爭奪戰，非傳統名校年年要打保護戰，收生一個不能少，好似2014年咁，新生嬰兒只有六萬個多少少，幾年後啲小一學位供過於求，小學校長唔以搶新生為第一目標先至奇，教學喎，搶到學生先至講啦。
傳統名校，番禺會所華仁小學直屬灣仔華仁中學，夠晒吸引力，據星島日報報道（二月十二日教育版），會將校舍搬往北角前丹拿道已婚警察宿舍地皮，建築工程最快今年年底開始，學校搬往北角之後，該校所屬學校網係唔係應該由灣仔撥入北角（東區校網）？左丁山以為實係啦，點知原來有東區中小學校長不滿，羣起向教育局反對，指責教育局事先無諮詢喎。咁都要諮詢？唔睇報道，我地啲外行人唔知，原來係東區係收生不足嘅重災區，華仁小學搬入東區，就係多隻香爐多隻鬼，何況呢隻鬼特別猛料，北角區學生豈有不爭住入華仁之理？咁就好影響東區校網內嘅學校生計噃。講教育？冇學生即係冇錢，講鬼講馬咩。如果我係東區家長，我一定歡迎華仁小學搬到北角呀，以前唔可以跨區選校，以後豈不開心？但香港就是如此辦教育，不是優勝劣敗，而是大鑊飯主義，學生係小肥羊，校長要逐隻分，唔知東區有冇家長會支持華仁小學加入東區校網呢？學校有學校收生不足嘅慘情，家長有為子女選校慘，與左丁山兒童時代讀書入學簡簡單單，不可同日而語。昨日聽完女律師E講及最新本地名校與馳名國際學校之讀書催谷實況後，心諗算嘞，認命用電腦派位讓子女入學便是，但朋友Y大力反對，指咁做法係不為下一代前途設想。唉，咁多設想，唔怪得有家長向名牌幼稚園校長送名牌禮物咯，咁樣爭法，名校校長要忍得住極大引誘，基層家長何來有競爭力？