日聯下個星期就開波，今日先踢日本超級盃，大阪飛腳對浦和紅鑽極可能嚟場入球騷，喺過去一周嘅亞冠盃，四支日本隊竟然有三隊輸波，包括出戰超級盃呢兩隊，要爭番面子，同埋唔好俾球迷嘈，一定全力爭勝打好波。飛腳有打過拜仁件宇佐美貴史狀態唔錯，浦和亦有新前鋒隆比真歷，大家對攻博捧盃攞頭威，入球「大」有1.85倍，今時今日算好分啦。
另一場心水，就揀咗星期日英超阿仙奴對愛華頓（圖）呢場「讓球主客和」「客勝」，兵工廠周中場歐聯1:3輸畀摩納哥，輸成三個作客入球都可謂一鋪清袋，要及時反底唔係咁易，相反「拖肥糖」今季表現好難捉摸，主場更加信唔過，但作客間中有驚喜，大隻中鋒盧卡古近期狀態唔曳，近三場入五球，兵工廠未必讓得起囉。
度完波，走去球場，遠遠見到流浪青訓總教頭豪哥，見佢面燶燶知佢一定有啲野，拉佢埋大排檔坐低飲杯奶茶問吓咩料，佢話：「領隊，新正頭真係行衰運，年底忙到飯都冇時間食，又訓練班、一隊操練、梯隊又比賽，頭都暈埋，結果U18比賽出錯咗個停賽球員，今日收到波總罰款信。」我話咁咪大件事？肥豪飲啖茶繼續講：「本來罰錢事小，但係流浪青訓出名，從冇犯過咁低級錯誤，今次令球會受罰真唔好意思。」唔錯都錯咗，返唔到轉頭，最緊要唔好有下次。
本地職業領隊
耳聽八方 專收好料