摩納哥周中踢出漂亮嘅穩守突擊足球，爆冷擊潰阿仙奴，賽前睇錯都值得拍爛手掌；拙欄還是再從冷門隊出發，重點博水晶宮，靠穩守突擊及較強鬥志，喺今晚英超早場蚊型倫敦打吡戰，作客頂住韋斯咸。
戰術其實冇話過時老土，各師各法，自己最回味，仍然係英國老式嘅高Q大腳，長傳急攻；至於穩守突擊，勁到好似摩納哥咁演繹，一啲都唔out。好似今晚英超早場焦點，係教過韋斯咸嘅現任水晶宮波士柏度；筆者十年前嘅三月，第一次獨闖槌仔幫嘅烏普頓公園睇波，佢哋當時喺英冠由柏度領軍鬥克魯，舒寧咸幫主隊入波先，最後俾對手追番1:1完場。
十年後嘅今日，當時正選嘅中場麥克盧保，仍然係韋斯咸嘅主力，仲啱啱簽多五年長約。倒戈嘅柏度呢？巴閉到年頭可以由紐卡素跳槽過水晶宮，仲即刻助新東家取得四連勝；近兩仗先至喺聯賽主場以1:2受挫於利記同阿仙奴，但睇到班波嘅表現唔失禮，新領隊效應未減退。
水晶宮前線有生氣
水晶宮今場三大箭頭費沙甘保、耶耶辛洛高同查馬克都傷咗唔出得；不過前線人手不缺，韋費特沙夏（圖）有番生氣，可以由右翼移中，柏度又可以派上仗鬥阿仙奴幾乎梅開二度嘅格連梅利掛帥。至於殺着當然係翼鋒恩歷克波拿斯、賓捷安同杜韋加爾呢類快馬；仲有澳洲籍隊長積甸拿克隨時候命，喺中場掃蕩，更利打穩守突擊。
相反季中起，唔上唔落嘅一眾英超中游分子，不宜再熱捧，其中韋斯咸暫排第八，但同前列球隊分數同實力都有一定距離，來屆歐洲賽夢難圓，亦睇到班波今年嘅走勢轉弱，近五戰不勝；前線又冇高佬安祖卡路爾，少咗瓣高空波，鬥弱隊蝕底。今場可取受讓平/半超高水嘅水晶宮下盤或直取和局。
另外兩場選擇，同樣係攻擊中游分子。紐卡素喺柏度跳船下，又不愁降班，鬥志更散；希望作客嘅維拉，一眾攻擊球員，搵番射門鞋，幫新領隊舒活做齣好戲，開個冷W。至於史雲斯上周贏曼聯，但今晚作客嚟到鬥志強橫嘅般尼，其實冇優勢，呢場又可博和局。
波神
神級攻略 智破足彩