熱刺周四喺歐霸盃三十二強次回合，作客費倫天拿以0:2落敗，兩回合輸1:3出局，但歐偉倫當年名震天下嘅單刀橫傳，十三年後竟然重現！今次主角係蘇爾達杜，呢位西班牙射手喺上半場有球單刀機會，佢見隔籬有查迪尼跟上，諗住妙傳畀呢位隊友啦，點知就俾費倫門將尼圖捉到路，白白浪費咗個先開紀錄嘅機會。可能有人會幫佢辯護，話佢都係唔自私想造就隊友啫，但佢本身係一位射手，呢啲情況有信心梗係自己射喇，點會選擇交波啊？
唔係蘇爾達杜敗家，戰果可能完全唔同晒，但睇到熱刺今場半力出擊，就知聽日英聯盃決戰車路士先係重點。至於車仔就喺大戰前宣佈同日本車胎生產商Yokohama Rubber簽約五年（下圖），贊助費約四千萬鎊（約4.8億港元）；下季球衣嘅心口贊助，亦會由韓國三星嘅標誌，轉為呢間日本品牌。
識睇，一定係睇足英台【英波Live】：
http://soccer.appledaily.com
http://bit.ly/engballlive