特首梁振英噚日喺禮賓府搞新春酒會，除咗政府官員到齊，城中大孖沙、知名人士、傳媒高層好多人有到，城中政要權貴名人團拜，場面好熱鬧，當中最受歡迎嘅人、成為「集郵」目標嘅並唔係CY，而係長實集團主席李嘉誠，唔少人都走埋去同超人傾幾句，超人非常順得人，有求必應，佢亦畀足面主人家，同CY夫婦談笑甚歡，轉個頭又同財爺曾俊華有傾有講。
CY多謝大家交額外稅
主人家CY一樣滿場飛，仲同《蘋果》社長兼老總堅哥有傾有講，天南地北，閒聊之間，難免講到傳媒，堅哥話《蘋果》走中間路線，CY就笑笑口答咗一句「唔似噃」。
讚賞預算案得體嘅超人，噚日見到鬍鬚曾似乎好歡喜，須知道鬍鬚曾做局長時，曾反駁超人喺河套區設工業特區嘅建議，話「香港唔會返轉頭再做膠花」，家陣超人讚鬍鬚曾，真係慧眼識才。
CY喺新春酒會致辭時提到利得稅、薪俸稅收多咗好多，話知道現場好多人請好多好多會計師、稅務顧問，不斷向政府交稅務報表，令特區政府可以收多啲稅，又話一定會將收入用好，幫助低下層，仲希望明年可以重複講多次呢番說話，就係多謝大家交畀特區政府額外稅款！該在場人士同八方講，唔少商界人士聽完CY「講呢啲」，無不你眼望我眼，唔知佢想講乜，相信無乜人會笑住交稅啩，何況交畀特區政府？有人瞄向財爺陰陰嘴笑，真係一切盡在不言中喇！
