NBA周四重頭戲，近期走勢最勁嘅騎士主場鬥今季戰績最好嘅勇士，結果「大帝」勒邦占士（LeBron James）發威攻入個人今季新高嘅四十二分，帶領主隊以110:99贏咗呢場總決賽預演。
主場嘅騎士對上十九場波贏足十七場，而勇士嘅四十四勝十負戰績就係聯盟最佳，兩隊周四碰頭就梗係有睇頭啦。不過，今場除咗係冠軍前哨戰，亦都係兩位常規賽MVP熱門人選占士同史堤芬居里（Stephen Curry）嘅對決。
騎士大勝 傷K艾榮
可惜居里同佢位「浪花兄弟」K湯遜（Klay Thompson）齊齊失威，全場加埋起手三十次，只係入到十球得三十一分，同喺一班主場fans吶喊助威之下發揮得淋漓盡致嘅大帝完全冇得比。今場交出四十二分同十一個籃板，刷新咗個人今季得分紀錄嘅大帝賽後就話：「我唔係要嚟爭常規賽MVP，只係為我班隊友而戰；落到場我嘅目標就只係要成為隊友嘅MVP，盡力為球隊贏波。」
不過，之前因為背傷同膝傷休息過一排嘅大帝，今場可能去得太盡，搞到個背脊又有啲痠痛，但就冇咩大礙。相反，佢隊友K艾榮（Kyrie Irving）喺第三節整傷左肩，周五作客溜馬未必打到。
識睇，一定係睇足英台【英波Live】：
http://soccer.appledaily.com
http://bit.ly/engballlive