梁振英新年去完馬爾代夫旅行之後變成「黑面神」，噚日出席立法會搞的新春午宴時，雖然泛民議員全體杯葛，佢都好開心同建制派議員分享自己變成「黑仔」之謎。
據建制派議員同八方講，梁振英一入場就分享馬爾代夫之旅點好玩，大讚當地啲沙同珊瑚碎「摸上手好似cream咁」，又引述CY講：「佢話頭嗰三日搽咗好多防曬，跟住發現自己一啲都唔黑，好似冇去過曬太陽咁，於是乎去到第四日就唔搽嘞，變成今日咁樣。」
有建制派議員席間笑CY係咪暴曬過度變「面燶」，但佢立即否認有「曬燶」，仲話「冇啊，冇甩皮啊，幾好啊」。至於今次重遊舊地有乜咁開心，CY就話最開心係老婆同個仔傳昕「個個都釣到魚」，但就無透露有無釣到龍蝦。
長毛咖喱范幫手「開年」
至於畀面「出席」嘅泛民議員，社民連主席長毛同新民主同盟范國威，原來到場只係為幫梁振英「開年」，范國威飯前向梁振英送上一幅名為「臨崖驅狼」嘅水墨畫，梁振英見到幅畫明顯唔開胃，全程都擰歪面拒接。長毛就送上「誠實豆沙包」，又提醒立會主席曾鈺成，即使梁振英祝佢身體健康，佢都要小心，因為梁振英經常講大話，最終長毛被保安趕離場時，大嗌一句走音「梁振英下台」至離場，引來全場笑聲。
立法會之後就開始玩新年遊戲，最終官員隊雖然擊敗議員隊獲勝，但最終只砌出「心想」兩個字，「事成」兩個字唔見咗，難怪同梁振英同枱的「大師」林大輝睇到都忍唔住大笑。
李八方
mailto:[email protected]
