○五年利物浦歐聯決賽奇蹟反勝AC米蘭捧盃，紅軍球迷都叫呢場做「伊斯坦堡奇蹟」；不過喺周四歐霸盃三十二強次回合，利物浦再訪伊斯坦堡就奇蹟不再，作客0:1不敵比錫達斯，兩回合打和1:1，互射十二碼仲有中堅洛夫雲宴客，以4:5出局，連紅軍歐洲賽十二碼全勝嘅金漆招牌都打爛埋㖭。
洛夫雲「飛機」歐霸止步
首回合領先1:0嘅利物浦，呢場作客嚟到土耳其都好進取，可惜上半場史達寧連番開弓都唔入，史杜列治處理單刀又太老定，俾對手門將高漢撲出。比錫達斯大難不死，下半場又係靠「紅軍剋星」丹巴巴亞入波，不過呢位前車仔射手唔係直接射入，而係72分鐘一次美妙後腳，造就托爾基阿斯蘭勁射入網，兩回合追成平手；加時階段雙方都冇入球，要以互射十二碼分勝負。紅軍之前歐洲賽歷來三次射十二碼贏晒，包括○五年歐聯決賽喺同一球場射贏AC米蘭，點知今次冇咁好彩，比軍頭五球都射入，幫紅軍守尾門嘅洛夫雲主射一飛沖天，就咁以總比數4:5落敗，三十二強就止步嘞。
紅軍前鋒史杜列治賽後就失望咁講：「今場我哋真係運氣唔好。下周日仲有一場大戰，我哋要收拾心情應付。」史杜口中嘅大戰，就係主場對曼城嘅英超大戰。唔係我求大俠幫紅軍講好話，𠵱家英超前四爭奪戰咁激，曼聯同修咸頓本身冇歐洲賽跟身，熱刺同日亦喺歐霸盃出咗局，阿仙奴歐聯出局機會都九成九，紅軍如果晉級，對佢哋爭前四真係好蝕㗎。不過，紅軍休息時間比踢完歐聯嘅曼城少兩日，史達寧同安利簡恩等又打足百二分鐘，仲有馬馬度沙高等傷兵，真係幾難踢。
至於當年有份締造奇蹟嘅前紅軍門將杜迪克，周五就以歐霸盃大使身份幫手進行十六強抽籤（見附表），五支入圍嘅意甲球隊果然避免唔到同國交鋒，淘汰熱刺嘅費倫天拿將硬拼羅馬，國際米蘭就遇上目前奪標大熱禾夫斯堡。
識睇，一定係睇足英台【英波Live】：
http://soccer.appledaily.com
http://bit.ly/engballlive