早排因為家庭糾紛成為娛樂版頭條人物的資深大律師胡漢清，噚日出席加入自由黨記招時，被問到有關私事會唔會影響自由黨形象，該黨榮譽主席田大少即為佢解圍，指每個人都有自己私生活，「如果我嘅私生活中，如果個個都要守得咁高要求，唔係我做人嘅道理」。
胡漢清聽到後，即多謝田少解答，大讚自由黨有作為政黨嘅胸襟，唔會介意「私生活有失敗、或者遺憾又好」，又反問呢啲事「邊個人冇吖」。胡又指，有朋友覺得傳媒對佢特別關注，係因為唔想佢講咁多嘢，「你越要我唔要講，我就係越要行使呢個權力」。胡漢清又笑言，好多時傳媒比佢更清楚家庭糾紛，話不論公事私事，自己都想吸收經驗：「有失敗之處、有遺憾之處，我接受。」話自己最緊要係有錯就認，有遺憾就向前看。至於糾紛進展，胡漢清話只可以講進入司法程序，「係不容許置評，多謝大家關心」。