經民聯梁美芬噚日同傳媒茶敍，順便拜吓年兼派利是，八方見到利是封已經感到震撼，因為上面印有一位手握拳頭，狀甚自信嘅女子卡通公仔（圖），連經民聯肥老闆張華峰都大表驚訝。梁美芬就解畫，實情呢個圖案係佢二○○八年選立法會嗰陣，義工助選團中一名讀緊中四嘅女義工幫佢設計，圖中卡通公仔之唔係就係梁美芬囉。
梁美芬話今年新年悶悶地，咪一於用番當年嘅圖案做利是封，仲話呢個圖案寓意為自己加油同埋自己有好多粉絲，講番當年設計圖案嘅女仔，𠵱家已經走咗去美國一間設計公司度做設計師。當旁邊嘅肥老闆好奇乜梁美芬嗰陣時咁瘦，八方只係諗起過去就讓它過去吧。