過年前，內地財經作家吳曉波寫咗篇文章，話喺日本見到好多中國遊客狂掃智能廁所板，可以洗pat pat又有瞬間加熱功能，「令所有屁股如沐春風」。其實佢篇文章係借題發揮，主旨講中國製造業成本高昂，又唔識將產品升級轉型。點知文章掀起一場口水戰，各路人馬狂抽水，中國製造業真正問題冇乜人去關注。
吳曉波文章踩中國製造唔掂，廠家當然要反駁。有啲話日式馬桶不符中國國情，好多人仲用蹲式廁所，又話中國水質冇日本咁乾淨，好容易堵塞，買番來即係崇洋媚外。但實情係，由於呢場罵戰引起關注，今個春節有大量中國遊客去日本掃貨，令廁所板成為最受歡迎產品！官媒《環球時報》睇唔過眼，噚日就提出另一套歪理，話日本由當年的全球家電霸主，淪落到今日賣廁所板，正是因中國家電的崛起，證明咗中國製造業的出色，所以唔需要去學。
喺呢個春節，Citizen（星辰）內地廠房宣佈解散、微軟關閉在華兩地工廠、Panasonic、Sharp和TDK等公司計劃把製造基地遷回日本本土，世界名企紛紛加速撤離中國。內地製造業危機，明眼人都睇到。呢啲人特登視而不見話乜嘢，正好演繹乜嘢叫「夜郎自大」。
李可強