香港佛教聯合會噚日舉行新春團拜暨第六十一屆董事就職禮，近日被麒麟撞飛而成為花生友熱話嘅新民黨主席葉劉淑儀都有出席。一身紅衣嘅葉劉喺典禮開始前十分鐘到場，同新任佛聯會會長釋智慧寒暄幾句，不過葉劉今次絕對唔係不請自來，而係收到大會邀請。
遇過麒麟、今次輪到醒獅招呼葉劉。現場有義工喺醒獅未表演時笑笑口話，唔知葉劉會唔會又企錯位？嗱，前日踩入沙田同舞麒麟師傅不撞不相識嘅葉劉，今次就坐定定睇表演，當兩隻醒獅由台上舞落台下穿梭嘉賓席，坐喺走廊位嘅葉劉趁醒獅經過身邊時，更加伸手「抽水」摸吓獅尾，即刻又成功吸睛，但佢摸咗一嘢就收手，睇完舞獅，就職禮未開始就閃咗。