雖然吳君如去咗美國洛杉磯度假，但仍然心繫香港同佢套賀歲片《12金鴨》，又想多謝謝霆鋒客串演出馬志堅呢個同志角色，所以專登拍咗條片送畀霆鋒。玩係君如本色，所以條片名就叫《13道鋒味》擺明開霆鋒美食節目《12道鋒味》嘅玩笑。
片段一開始見到君如異常正經着住廚師裝，以《12金鴨》張近萊嘅角色嘅男聲，教人點整煙熏鴨胸放入焗爐焗。不過君如戴住對洗碗手套煮餸就已經出賣咗佢，果然因為時間關係，當君如拎件製成品出嚟嘅時候，就變咗一隻黃色毛公仔鴨。
霆鋒Chok樣拜年
另一邊廂睇完條片後嘅霆鋒，就好認真咁指證咗君如嘅錯處，笑笑口chok住嘅霆鋒話：「吳君如真係，你擺落個焗爐又話熏，明明係焗，又唔講溫度同時間……」一副大廚口吻，最後就係例牌同觀眾拜年。
另外，《12金鴨》推出加長版有台灣靚仔彭于晏畀君如「胸襲」，片尾君如自己都話想即刻飛返香港睇。
撰文：馮仁昭