兩場大型選舉將至，唔少政黨已經私下做民調，用嚟參考安排各區擺位。花生友聽聞，自由黨近排到做咗個民調，睇番各區立法會議員嘅支持度，一向「暢所欲言」、叫梁振英考慮辭職而被搣柴冇得做全國政協委員嘅田北俊，支持度狂升，唔單止喺新東即係佢𠵱家嘅立法會選區受歡迎，喺其他區尤其港島區，支持度同其他現任議員相比都係頭幾名，打低唔少建制同泛民中人。
最驚民調好睇唔好食
好明顯，田少嘅「嘜頭」有吸票力，但花生友聽聞佢哋黨內嘅分析，卻唔太樂觀，覺得田少嘅支持度大增、未必轉化到做選票帶挈黨友，最驚呢啲民調好睇唔好食，○八年立法會選舉就係一例，所以都係要加強地區工作靠勤力箍票。
而田少雖然淡出自由黨領導層，但個黨剛剛成立嘅「選舉策略委員會」，則由佢揸莊。據聞委員會主要做形勢分析、部署同宣傳等，佢哋當然繼續針對中產票源，而且銳意吸納泛民喺佔領行動流失嘅專業、中產票，田少日前仲透露，佔領行動後有大概五十至六十人入黨，建制黨派中竟然喺雨傘運動有斬獲，實在罕見。
大家最想知道，當然係田少係咪再出先？有自由黨中人話，如果唔再選，即使田少全港支持度第一名都冇用，而截至目前，田少仍然吹出退下火線嘅風聲，但政治一日都嫌長，君不見有人話N屆都唔選，點知𠵱家做埋特首㖭。
花生友