譚詠麟（阿倫）一連十三場的「銀河歲月四十載演唱會」前晚於紅館舉行尾場，毛舜筠夫婦、羅霖及鄺美雲等撐場。阿倫一出場便趁初七人日向歌迷說生日快樂：「希望大家年年廿五歲。」之後他獻唱多首經典金曲，搞氣氛之餘，還有感性一面，被熱情歌迷感動到兩度落淚！
帶五月天收利是
其中一名女粉絲送花及一籃士多啤梨後對阿倫說：「多謝你唱咗咁多年好歌畀我哋，無言感激，應該係我哋同你講。」阿倫聽完眼濕濕謂：「盡力而為。」安哥部份，阿倫又感觸地說：「未知未來日子會係點，但自己好希望可以唱到八十歲，過去十三晚，每一分一秒我都會記得。」說完這一句，阿倫已熱淚盈眶，停了一會便唱出《無言感激》。
前晚阿倫邀請台灣天團五月天做嘉賓，他們合唱《愛情陷阱》時，阿倫帶住阿信和冠佑走到台邊收利是，阿倫還將利是塞入石頭褲袋中，阿信笑指是第一次，阿倫笑說：「吓？我日日都有，靠呢啲嚟維生。」之後五月天再唱《突然好想你》，令全場high爆跟住唱。
送雲吞麵謝歌迷
完騷後，阿倫被問為何如此感性？他笑說：「我終於可以做番個普通人，普通嘅肥仔。其實自己頂到冇喊出嚟，忍到好好嘢！」他坦言喊完要休息兩、三日，所以之前一直忍得好辛苦，阿倫在台上為答謝fans，說可憑演唱會飛尾去左麟右李店舖免費食一碗雲吞麵，可有問過克勤？他笑說：「唓！有乜所謂，嗰時『左麟右李』都係咁。但唔好同一時間去幫襯，八萬幾碗有排煮，咁就真係不得了。」
阿倫又透露特製一套有生日日期的box set送給嘉賓，內有四種不同顏色的Cashmere。是否五十周年才再開個唱？他說：「唔知㗎，可能八十歲先唱，大家一定等到嘅。」
採訪：譚倩宜
攝影：陳慧安
