中環在線:IPO記者會 楊主光扮喬布斯 - 李華華

中環在線:
IPO記者會 楊主光扮喬布斯 - 李華華

「蘋果教主」喬布斯着T恤、牛仔褲喺台上行嚟行去介紹產品,應該已經成為科技、電訊業嘅招牌動作,就連香港寬頻(1310)噚日舉行招股(IPO)記者會,現場佈置同行政總裁楊主光(William)嘅演講形式都十分之「喬布斯」呀。
William雖然唔係着T恤、牛仔褲,但係都專登着西裝唔打領呔,整番個標準IT人look。
至於個場就貫徹蘋果風格:燈光暗,只得一幅背景板,演講內容就俾William自由發揮,佢當然係咁硬銷香港寬頻好值得投資喇。
相對一般新股上市,管理層着整齊西裝,坐定定喺長枱後面,對住講稿介紹公司同埋答問題,香港寬頻的確與別不同,不過對於投資者,呢啲都係門面嘢,最緊要上市後股價有料到。