財政司司長鬍鬚曾發表預算案後民望急升，噚日接受電台同立法會記者訪問時，至少三次用「神棍」同記者自拍，又狂用facebook分享靚相。鬍鬚曾噚日被問到上述舉動，係咪想收買對梁振英最反感嘅香港年輕人時，就話其實係梁振英鼓勵官員多用社交媒體㗎喎。但有傳媒質疑，梁振英連囡囡齊昕用fb都似乎唔鍾意，點會鼓勵官員用fb？鬍鬚曾無再回應，只係話現時社會好多人都用社交媒體溝通，官員亦會使用。
李卓人讚「點都比689好」
鬍鬚曾噚日出席立法會講解預算案時，唔少議員都大讚預算案，其中工業界議員林大輝，就讚預算案係鬍鬚曾任內最出色一份，可以為政府「沖喜」，大大補充梁振英施政報告嘅不足，挽回市民唔少信心。
大輝仲讚鬍鬚曾預算案中，話解決問題要對話而不是對立，係「擲地有聲，發人深省，講得好漂亮好感動，嚴格來講係話中有話」，批評現時有高官「選擇性對話、選擇性溝通、選擇性友好、同選擇性埋堆」下，鬍鬚曾寫呢段嘢前，有無同梁振英傾過？
鬍鬚曾就話預算案係佢同同事好努力，喺過去幾個月「自己準備出嚟」，過程中會同特首同各方面「有啲商討」。除建制派大讚，泛民亦有唔少人讚佢，公民黨黨魁傑哥噚日話鬍鬚曾喺預算案連徐小鳳首歌都搬埋出嚟，點都比只識惡死鬧學生嘅梁振英好。工黨主席李卓人更一度錯稱鬍鬚曾做「特首」，指鬍鬚曾做特首雖然都係弊，「但點都比689好」，鬍鬚曾聽到笑騎騎囉。
李八方
mailtO:[email protected]