熟悉嘅故事，親切嘅感覺，每年重覆一次，阿仙奴睇怕今年又會喺歐聯十六強出局嘞。周三場十六強首回合賽事，槍手主場對被視為今屆實力最弱嘅摩納哥，全世界都睇好兵工廠呢次終於有機會破宿命闖八強，點知，似乎真係宿命難違，喺前鋒基奧特連番失機下，輸1:3，失咗三個作客入球，面臨連續第五年喺十六強止步。
失三作客入球畀摩納哥
歷史總係不斷重覆，尤其係阿仙奴嘅歷史，真係每年都重覆一次。人哋摩納哥嘅中場干度比亞一次射門就開紀錄，換邊後仲靠貝碧托夫入多球。相反，阿仙奴班球員就射極都唔入，其中賽前話職業球隊有四五個球員食煙好正常嘅基奧特今場六次攻門，全部唔中目標，佢下半場有次執雞，但對住個空門炒高。喺六十分鐘，領隊雲格都頂佢唔順，搵禾確特入嚟換走佢。
反勝晉級成功率得1.7%
踢到九十一分鐘，另一名後備兵阿歷士張伯倫射咗個靚波，幫阿仙奴追成1:2，叫做有番啲希望，次回合冇咁難追。點知話口未完，三分鐘後，壓得太上嘅阿仙奴俾摩納哥一個反擊搞掂，恩歷克卡拉斯高幫客隊射成3:1完場。
大嗱嗱失咗三個作客入球，阿仙奴要喺下個月十七號作客摩納哥場次回合，至少入到對手三球先有機會出線，認真難搞！據統計，喺歐聯實行作客入球規例後，有一百七十五場主隊喺首回合落後1:3，但最後佢哋只有三次喺次回合作客反敗為勝出線，晉級成功率只係得1.7%！
有網民講笑話，阿仙奴下場應該贏到2:0，之後光榮出局，因為近幾年嘅劇本都係差唔多（見附表）。例如對上兩屆對拜仁慕尼黑，阿仙奴首回合喺主場都輸波，但反而作客安聯嗰兩場都唔使輸。雲格賽後都無奈咁恭喜摩納哥實至名歸咁贏波，「人哋完美表現，我哋就前場失機，後場自殺。我哋一來防守差，二來冇運，因為第一球失球係省到人改變方向。我哋最大嘅問題係喺下半場開始太心急，忘記咗最重要嘅係唔好失第二球，我哋實在太唔夠耐性。」抽到支好籤都輸到咁，呢隻鑊雲格肯定走唔甩㗎嘞。
問到點睇基奧特不斷失機，雲格就話：「佢呢場唔太順，睇嚟佢唔喺最佳狀態。」其實高登網民上年已經幫基奧特二次創作咗首《銀河唯一基奧特》，諷刺佢把握力低；我求大俠睇完場波，都忍唔住上去聽一次，真係寫得應景，「就在門外，兩碼射球，身軀只向後，這記射波真糟透，掩眼扮蒙羞……」
識睇，一定係睇足英台【英波Live】：
http://soccer.appledaily.com
http://bit.ly/engballlive