回南天，望出窗外以為自己去咗仙境，忍唔住打開窗，感受一吓仙氣，即刻俾屋企人鬧話引晒啲濕氣入屋，但又有人話回南天係要開窗㗎，因為要空氣流通，濕氣先唔會積聚。七嘴八舌，沒完沒了。Google過，兩種說法都有。
前天文台台長林超英就一錘定音，「唔應該開大窗」，因為呢個時候冬天剛過去，石屎牆仍然會比較凍，而春天的霧氣比較暖，如果一下子大量飄入屋，暖空氣遇到冷冰冰嘅牆身，就會好快變成水份，牆身就會好快濕晒，積聚得多好易發霉。
咁係咪要閂晒啲窗？前台長話唔開窗當然可以阻止濕氣進入，「但你都要氧氣呼吸㗎」。
#開條罅就夠
所以，佢話只需要開條罅就夠，畀新鮮空氣入屋，亦都會令暖空氣減慢入屋，慢慢咁接觸牆身，令牆身溫度逐漸變暖，令空氣同牆身溫差收窄，就冇咁容易令牆身積聚水份。佢話如果開埋抽濕機，就可以減低屋內嘅濕度。
回南天閂晒啲窗，係消極嘅做法，開條罅，就係中庸之道。凡事留三分，佢話做人其實都係一樣。係時候，由林超英教你做人嘅道理。
費清 ＃要生計，也要生活 ＃毋忘初衷