新一份預算案摘要單張被發現「政治不正確」，竟然將台灣當成中國境外地方。嘩，一涉及統一問題，就好鬼敏感㗎嘛，一唔小心就會被各界上綱上線，所以呢，政府以極高嘅效率處理呢件事，就係回收晒派剩嘅單張，寧畀人知、莫畀人見。
財政司司長發言人證實，原本設計冇錯㗎，但印刷版過程中卻出錯，相信係軟件轉換圖片所致，網上版就冇錯。而政府噚日已經停止派發有關單張（圖），以免事件越鬧越大。到底前日派出幾多份？政府無數計，但據知派得七七八八。錯就要認、打就企定，雖然單張有個極度敏感嘅錯誤，但都有政界中人讚佢哋以圖像代替文字解說，市民好易消化。