下個禮拜，一年一度嘅兩會就開幕，阿爺晨早就揚晒今年會放水，舊年底突然減息，加埋過年前忽然降準，阿爺擺明畀你睇今鋪唔係大隻廣，乜野調結構，點樣調等阿爺去諗，作為喺股海搵食嘅一分子，水流去邊先係最重要。
政府要扔錢出嚟刺激經濟，來來去去都係得嗰幾招，一係倒錢落去銀行，等佢水浸就自然要排洪，另一個方法，就係求人不如求己，索性自己扔錢出嚟搞基建，大陸要打通各地交通，鐵路、公路股當然係其中一個選擇，但近期中央啲思路睇嚟，水利股先夠in。
其實水利係近年阿爺好集中去處理嘅問題，重視程度係去到喺舊年一號文件提出，總理李克強喺舊年亦都講咗，今年水利工程項目發展非常重要，而且水利喺近期唔同嘅文件都不時提到，包括前日國務院會議，大鑼大鼓要以財稅政策支持，過年前降準，人行解釋其中一個要幫助嘅都係水利。
基建股中，鐵路公路股再升空間有限，阿爺撐三農撐咗十幾年，水同農業息息相關，所以識得炒一定炒水利股！
流氓