廠商會早排換屆競爭激烈，兩派陣營選會長時擦出唔少火花。換屆後嘅首個廠商會新春團拜（圖），桃花依舊，人面有啲唔同，場面似乎仲無咁熱鬧，比起往年少咗會董出席撐場。
八方對此覺得奇怪，有廠商會中人則以獨特「分析」叫大家唔好大驚小怪，佢話今年場面唔夠墟冚，因為唔少人出外度假未返港，加上團拜後又要開會、晚上又有飯敍，未必個個有時間抽成日出嚟連走三場啫。哦，應該同換咗會長冇關啩？又原來，啲商會中人會對連走幾場覺得吃力㗎喎。
換屆之後，廠商會年度重頭戲工展會，搞手亦即時易帥，由副會長戴澤良接替吳永嘉擔大旗，戴澤良話希望一兩年內可以分別喺澳門、台灣舉行工展會，推廣香港品牌。至於吳永嘉，唔知明年可唔可以喺工業界二功能組別接林大輝班？