近期因「樓市爆煲論」而人氣急升嘅紀惠集團行政總裁湯文亮，可能因言論太過出位，令到個別人士唔多滿意，喺灣仔街舖門口貼佢街招，鬧佢係「沒誠信商人」！
華華噚日下晝行經灣仔，去到駱克道駱基中心嗰頭，喺一間放緊盤嘅吉舖門口，見到一張有湯文亮個樣嘅街招，上面寫住「沒誠信商人湯文亮」，再發現地下仲有好多俾人撕走嘅「殘骸」，起碼有十幾張。而呢個地舖，位置就喺湯文亮嘅寫字樓附近。
華華隨即打電話向湯文亮了解情況，佢語氣平靜咁話「今次已經係第二次，上一次係過年前，講爆煲論之後」。佢話上一次已經報咗警，未知邊個搞佢，噚日朝早已經叫公司班同事清走新嘅街招，大大話話有成百幾張咁話。雖然俾人貼街招鬧，但佢都好大方話冇乜唔開心，只係唔明白對方係乜意思啫。