奧斯卡揭盅，又即係碟舖搵錢季節，不論有份提名又或攞獎嘅，例必多咗人訂碟。老友昌哥話心急就買美版碟，好多港版藍光好似《星際啟示錄》、《大英雄聯盟》等都要三月先派貨，最多人等嘅《飛鳥俠》就要再遲啲，最快下個禮拜有套《鼓動真我》頂住癮先。
呢個禮拜冇乜藍光碟好揀，好彩龍叔叔一早鎖定張敬軒隻《Hins Live in Passion 2014》演唱會，昌哥大表奇怪：「未聽過你話鍾意軒仔嘅？咪扮後生好喎，睇《唐伯虎衝上雲霄》算罷啦。」想煲呢隻演唱會，絕對係俾英皇早前擺上YouTube嘅《青春常駐》所毒親。演唱會由軒仔擔任創作，《青春常駐》就搵嚟譚玉瑛featuring，講佢由八二年開始，做咗三十幾年兒童節目，幾深入民心都好，始終有退休一日。起初譚玉瑛姐姐表演棟篤笑，扮番auntie烏卒卒，講𠵱家小朋友都玩internet，唔要水晶球。到軒仔唱《青春常駐》，第一句「叮噹可否不要老」，已勒住一班三四十歲觀眾嘅心，唱到尾段，譚玉瑛姐姐換走auntie烏卒卒裝束，變番普通人，臨走時笑自己阻住地球轉：「走咪走囉，要學識放手。」軒仔感情大爆發，淚流滿臉唱出「為何在遊蕩裏，在遊玩裏，突然便老去？」再捉住譚玉瑛姐姐隻手唔畀佢走。譚玉瑛姐姐接唱最後一段「時光這個壞人，偏卻冷酷如許。」嘩，身旁女友即時喊到收唔到聲。龍叔叔都睇到眼濕濕，大佬啊，你先三十出頭，已經咁怕老，龍叔叔虛齡四十，仲要朝朝趕稿爬格仔啊！
人聲弱唔夠包圍感
雖然對軒仔嘅歌唔多熟，不過靚聲加感情型歌手，睇得龍叔叔好投入，尤其唱番彭羚嘅《完全因你》、陳慧嫻嘅《夜機》幾首經典歌，都有令人陶醉嘅男聲演繹，而同關淑怡跳辣身舞唱哥哥嘅《偷情》，都有新意同火花，抵佢做最受歡迎男歌星嘅，龍叔叔都開始鍾意佢。
演唱會藍光碟以BD50格式收錄，號稱德國壓碟，高清畫面算有水準，好多暗位搭上光猛spot light，都見到details位。但大家最受落嘅DTS-HD MA，前、後置喇叭嘅人聲過弱，軒仔好多氣若游絲嘅靚聲，都俾背景音樂蓋過，而且5.1聲效嘅包圍感不足，減低演唱會嘅氣氛。若當聽歌唔當睇演唱會，轉番PCM 2.0 96kHz/24bit，會聽得舒服得多。
龍叔叔簡介：
幾十歲老宅男，聽歌煲碟打機無一不癡，一生最大成就便是家中收藏幾千隻碟，假日只愛潛伏家中煲碟，親情跟愛情也拋諸碟後。
http://www.facebook.com/uncle.dragon.movie
