逢周五，咖喱牛腩都會跟大家暢談球壇的人和事。既會嘻笑怒罵，寫出激情，亦會冷靜分析，寫出理性。
英超剛獲破紀錄嘅本土電視直播合約，據報一場英超單係直播費已經過一千萬鎊，仲未計請星級講波佬、多角度攝影機等成本，水漲船高下，其他地區嘅直播費睇嚟都會加，香港球迷又要繼續捱高價月費。不過講番英超管理同包裝，又值得收咁貴，球場草地普遍都好靚，球會又有國際化視野，好似早排中國過新年，唔少英超球隊都拍番條賀年片，𠱁吓中國球迷，不過球證執法水準，就似乎未能跟得上英超嘅改進，甚至故步自封㖭。
上周英超都出現好多執法爭議，特別係車路士對般尼呢場，當中爭議判決已經講過，不再多談，今次小弟着眼點係英足總事後點處理。事件主角球證艾堅遜有冇受處分？答案係冇，周六英足總只安排佢擔任曼聯對新特蘭一戰嘅第四球證，似乎已經當作懲罰，以往犯錯球證會被安排吹一啲低組別球賽，艾堅遜甚至唔使面對呢種處分，三月三日修咸頓對水晶宮一戰，艾堅遜就繼續坐番正，間接等於縱容艾堅遜。
小弟唔知英格蘭係唔係真係有一種反車路士、反摩連奴勢力，但英格蘭足總，特別係紀律委員會嘅作風真係打擊英超嘅威信。車路士前鋒迪亞高哥斯達喺對利物浦一戰被秋後算賬罰停賽三場，相反今次就放生般尼前鋒艾殊利班尼斯，又點叫車路士球迷，甚至中立球迷收貨。下周日英聯盃決賽車路士對熱刺，又睇吓喺全球數以億計球迷面前，英格蘭球證點樣搞花臣針對寸王。文：牽牛