香港人新年最常做嘅，除咗拜年食年糕、𢭃利是，我相信一定仲有打麻雀！我有個奇怪想法，就係如果英超Big 4領隊坐埋一枱打麻雀，會係點樣呢？
先睇睇着到成身紅色嘅雲高爾，佢埋位時大家都驚一驚，以為係麻雀大師，要贏佢應該有一定難度。點知打落先知係穩陣派，後面觀眾睇見佢啲牌，發覺就算一上手已經係大牌格，因為怕輸，都只會當雞糊打，次次一番起兩番止，外人就梗係睇得冇癮啦！呢個牌局最終只有一個贏家，但佢唯一目標就係一路可以繼續有得打。
再睇睇上風嘅摩連奴，打牌時未停過講嘢，一時就話人打守勢牌，扣起晒佢要嘅牌；一時又話個個都針對佢。雖然佢口多又寸嘴，但牌技真係高，可以話係一代宗師，有佢喺度永冇悶場。
西風嘅比歷連尼（圖）同雲格就牌風接近，可能因為兩位都係讀書人。一個有土木工程師證書，另一位就有經濟學學位。兩位都文質彬彬，但牌風就好進取。好多時贏得精采但輸得「甘」。或者佢哋唔似摩連奴咁識進退，但係就保持自我風格，同樣非常值得人尊重。
今周比歷連尼就要一戰來者不善嘅羅渣士，羅渣士近期一洗之前嘅黑氣，手風正順，而且今次仲有主場之利，比帥相信都好難贏，我估佢哋會「摸和」1:1收場。
LULU
不懂踢波愛睇波