馬圈萬人迷雷神莫雷拉，雖然剛周三晚食白果，連勝12個賽日後斷纜，亦已三期冇做過騎師王。但周日(3月1日)沙田馬場10場草地、泥地日馬，雷神是唯一跑足10場的騎師，而且座騎質量極佳，除了「電訊波士」外，其餘九隻全部於近三仗內，曾經勝出或上名，就算「電訊波士」未上過名，但上場雷神初騎，亦只不過輸個幾馬位，明顯有進步且已試準。
其他馬匹方面，馬王「威爾頓」、「輕彈錢笑」、「活力寶」、「包勝」都公認實力強勁，而且演出可靠，可預期有力為雷神喺騎師王彩池，攞到唔少分數。尤其「包勝」只跑過四場，評分肯定未盡，今次雷神新接手有鬥志唔在講，仲要抽到二檔及輕磅，真係跑第二都唔開心。
仲有賢廐「京城珍寶」，今季四戰兩冠兩亞越跑越進步，呢日(26日)雷神同蘇偉賢晨課猛咁傾，佢哋周日獨合作「京城珍寶」，可以話盡露搏殺手影，睇怕今期投注雷神騎師王，應該實食冇黐牙！
莫雷拉周日座騎
場次：馬匹(近三仗名次，左為最近)
一場：金威勝 (7、2、8)
二場：京城珍寶 (1、1、2)
三場：大家熊 (2、9、7)
四場：電訊波士 (7、5、11)
五場：輕彈錢笑 (2、3、1)
六場：包勝 (2、4、1)
七場：威爾頓 (1、1、5)
八場：百利多 (11、2、12)
九場：活力寶 (6、1、2)
十場：詠彩繽紛 (7、2、1)