隔牆有耳:吳秋北避談國安法 - 李八方

隔牆有耳:
吳秋北避談國安法 - 李八方

今年人大政協兩會議題,除咗自由行同水貨客,原本仲有由工聯會理事長、港區全國人大代表吳秋北帶起,將國安法引入香港嘅話題,但吳秋北呢個建議似乎胎死腹中。
工聯會噚日舉行新春團拜(圖),有記者問吳秋北爭取引入國安法有乜進展時,吳反覆強調「今日唔講呢個話題」。今日唔講,代唔代表上京唔講?之前話要聯署、今日咁講係咪等同擱置?記者梗係追問啦,點知吳秋北澄清,從來冇講過話要以聯署提案方式,將國安法引入香港,相信係記者有誤會,仲人肉錄音機回應「冇新嘢補充」。
薑越老越辣,此時名譽會長鄭耀棠出口幫拖,話內地仲未通過國安法修訂案,既然未有具體內容,梗係等草案出台先至算。答案係乜?呼之欲出。吳秋北最後話要就建議再研究,一早咁講咪好囉。