逢周五，咖喱牛腩都會跟大家暢談球壇的人和事。既會嘻笑怒罵，寫出激情，亦會冷靜分析，寫出理性。
摩連奴真係一個演說家，令人好易記得佢講嘅說話，好似每逢車路士遭受不利嘅誤判，小弟都會諗起佢嗰句「反車路士運動」。不過，唔好畀摩連奴就咁洗腦，其實邊隊冇做過球證誤判嘅受害者呢？
其實英超球證嘅誤判豈止一個，淨係上輪，都唔止車路士呢場，好似修咸頓對利物浦場波，球證都有漏判修頓十二碼，就連紅軍嘅祖阿倫賽後都承認自己有腳禁區攔截係中人唔中波，唔輸十二碼真係執番身彩。
球證誤判呢個問題，唔係一兩隊嘅問題，每隊都有機會成為得益者，亦可能成為受害者。因為每隊都唔知自己會因誤判得益多定受害多，所以最能保障大家嘅，就係搵方法盡量減少誤判出現。修頓領隊朗奴高文早幾日講過，多個人就多對眼幫手睇，佢認為做球證的確好辛苦，有誤判係要體諒，「球證唔易做，我覺得第四裁判應該可以參與更多，去幫球證。第四裁判同所有觀眾一樣，可以喺旁邊睇波，佢可以幫助球證執法。」
除咗高文呢個建議，最多人提議嘅係遇上爭議判決時睇重播片段，但有意見認為睇重播影響球賽流暢性。不過，有時見到啲球員就誤判圍住球證係咁嘈，浪費唔少時間，都好影響流暢性啦！因此，例如畀每隊每場一次「挑戰」機會，畀球證可以睇清睇楚，對比賽各方都係一件好事。當足球越嚟越受歡迎，會令人錯覺流暢性同觀賞性係最重要，但喺一項運動入面，運動員嘅利益同埋保障比賽公平先係最緊要。
文：咖喱