禮拜日(3月1日)沙田八草兩泥賽事，草地用B加2跑道，呢條跑道形勢似谷草，對內叠前置馬有利，上季3月1日同一移欄賽事便是最好例子，當日有七匹頭馬守前三位入直路下建功，當中「勝利雄心」、「無敵王者」及「邦之星」更加一放到底，另外，一至三檔亦包辦半數頭馬，所以要優先留意具前速之內檔馬。
今戰列陣馬中，第九場「點解」上仗於B加2欄贏馬，勝後今次等番同一移欄再跑，睇部署有心添食。另外，第六場「包勝」跑B加2欄一次即勝，改配莫雷拉重返強項，有運抽埋二檔好位，可坐位望贏。
至於禮拜日兩場泥地均跑1200米，今季此程一向利放唔利追，最近「榮光大道」、「愛頑皮」及「霸氣」都係放頭或跟前守好位贏馬，第二場「京城珍寶」及第五場「三和福將」等擅跑泥地之前置馬值得睇好。