facebook（fb）同selfie其實都興咗好耐，近日被財爺曾俊華玩一玩，忽然成為城中熱話，真係令人摸不着頭腦。不過唔好理咁多，有風就要跟，所以就連年過花甲嘅立法會金融服務界議員張華峰最近都開番個fb戶口。為配合農曆新年氣氛，佢嘅fb封面相片竟然係佢本人扮財神，真係估唔到佢咁玩得喎！
張議員噚日同傳媒春茗食晏時都承認，因為見到好多立法會議員都有fb，所以覺得自己都應該整番個，方便同大眾溝通，又可以畀公眾知道多啲佢嘅動向。咁又係呀，財爺噚日都話特首鼓勵官員多啲用社交媒體，立法會議員當然都要跟埋一份喇，特首應該淨係唔鍾意佢位寶貝千金齊昕用fb之嘛。