今次鬍鬚曾份財政預算案雖然畀人話新意欠奉，但都有搞搞新意思，就係預算案摘要小冊子，唔再玩文字，而係全部用圖像解構預算案，相信都係適應潮流，等市民易入腦。不過，八方發現摘要入面「擴大優勢」題目中，有一幅介紹「一帶一路」地圖，用深紫色代表中國、淺紫色代表其他境外地區，但最奇怪係，台灣竟然係用淺紫色！呢個錯誤真係可大可小，認真政治不正確。
八方打聽點解會咁，原來呢個圖原版係台灣用深紫色，但唔知點解喺電腦分色同印刷時出錯，印成淺紫色，事後又冇人發現，結果搞出呢個蝦碌事件。據知政府已立即補鑊，即時改正網上版，將台灣變番深紫色。