吳啟華在劇集《妙手仁心》中扮程至美醫生深入民心，馬上成為師奶殺手，早年轉戰內地，近年又折返香港拍劇。吳啟華於二○○七年與內地女星石洋子再婚，並育有囡囡吳熙兒，去年啟華承認離婚，囡囡放假才來港相伴。昨日有報道指早前啟華與苗僑偉（三哥）夫婦結伴到澳門賭博，而農曆新年期間，他們又到了美國拉斯維加斯，啟華再被拍到入賭場，由澳門賭到拉斯維加斯，「寡佬」啟華休假娛樂果然是無賭不歡。
𤷪𤺧輸清袋
啟華與三哥夫婦，日前結伴過大海，兩男到埗即殺入賭廳，他們既玩花旗骰，又玩百家樂，啟華手持數萬元賭本，聚精會神下注，每鋪上落最少一千蚊。啟華懶理被其他賭客認出，繼續投入玩樂。啟華後期手風轉差，更𤷪𤺧「甩」牌，最後將手上一戙千元籌碼清袋。報道又指啟華嗜賭受祖母生前影響，再婚之初比較少入賭場，離婚後一支公又賭癮大發，每次輸多贏少，上落都十萬八萬。
直踩打麻雀
啟華當日過大海一晚，翌日回港還直踩尖東約雀友麻雀耍樂，有指啟華最愛打大陸牌，一鋪都兩、三千元上落，有時甚至開支幾萬元紅酒，邊飲邊打，連賭兩日的吳啟華，第二朝出席完活動，夜晚再call雀友打牌止癮。記者昨企圖聯絡吳啟華被爆嗜賭，可是直至截稿前未有回覆。
撰文：劉敏
