老友M太太身體違和，送入養和醫院，檢查完知道係小事箒，並無大恙，老友M即刻成身鬆晒，想話即時辦理出院手續，點知M太話醫院清靜，小病是福，索性住多一日，唞夠先至出院，好就梗係好啦！醫生嚟巡房兩分鐘，巡房費用二千五百元，老友M想同醫生傾多兩句，醫生就趕住走。老友M嘆曰：「喺香港做醫生，真係天之驕子，收錢多多，唔駛睬客仔，全港唔夠醫生，特區政府都唔敢講句輸入醫生，反而建築工人唔夠，特首就在施政報告講咗一輪。」
建築工人點有資格同醫生比呀？醫生噃，尤其是私家醫院醫生，收入球球聲，勢力與影響力都蓋過晒建造業工人總工會啦。老友M話在醫院聽到嘅語言，起碼有五成係普通話，足證醫院內有唔少內地富裕病人，香港如有足夠醫院與醫生，做大陸病人生意都做唔切，大有機會成為亞洲醫療中心（Medical Hub），可惜呢，曾蔭權提出嘅意念，梁振英有大把醫生梁粉支持，完全不提。點解呀？因為現在香港醫生不足，要做Medical Hub，就要學足新加坡，大量輸入醫生啦。現任特區政府好想學新加坡政府咁有效率，欲以李光耀為師，但對於輸入醫生一事，絕對唔敢學習。
因是之故，曾蔭權在施政報告劃出六幅地興建私營病院，有五幅會改為公屋用途，只有黃竹坑一幅會興建成為一間私立醫院，提供五百病床。呢間醫院由全世界上市醫療集團市值最大之一嘅IHH經營，IHH屬下有一間子公司叫做Parkway Pantai Ltd，在新加坡擁有著名嘅伊利沙白山醫院與Gleneagles醫院，香港呢間亦會叫做Gleneagles，其行政總裁陳先生曾接受「星島日報」訪問，話間醫院以中產病人為對象喎。不過老友M嘅同學，隱形富豪V係高爾夫球發燒友，去到邊度旅行都打番場高爾夫，佢對左丁山講：「左仔，你知唔知道Gleneagles係咩意思呀？」真係考起，阿拉弗懂。富豪V話：「蘇格蘭有高爾夫球聖地St. Andrews，英國公開賽就在此舉行，我慕名去朝聖，打過幾場波，唔去過St. Andrews點算係高爾夫發燒友呀，嗰度有間Gleneagles酒店，係五星豪華級，你未必捨得入住一兩晚！Gleneagles個名，一聽就知係指富貴、豪華高檔，與中產階級一啲關係都冇！」鬼知道咁多嘢咩，人地新加坡大上市公司，梗有如意賺錢算盤嘅箒，又明益本港名醫搵錢啦。