叮噹有個百寶袋，財政司司長曾俊華都有個百寶箱，鬍鬚曾噚日一入會議廳就打開公事包，內裏嘅乾坤俾攝影記者影到晒。原來呢位「喼神」相當顧及自己形象，公事包內有一把長扁梳，係梳頭髮定係招牌鬍鬚？八方唔知嘞，只知入面嗰幾封紅色利是，同佢噚日出手闊綽向市民大派特派一樣咁搶，難怪唔少市民畀like，唔知有冇望藉此下屆跳入禮賓府？
呢邊廂齊昕話佢老竇梁振英唔知facebook為何物，嗰邊廂嘅鬍鬚曾則頻頻喺fb發表新帖文及相片；有網民留意到，無論佢喺立法會宣讀預算案、召開記者會期間、以致晚上接受電視台訪問，status都不斷更新，最誇張係佢上載一張自己走入立法會會議廳嘅相，寫咗句「雖然已是我的第八份預算案，但仍然有些緊張」，但出文時間卻正正係佢讀緊預算案嘅時候，除非佢個百寶箱分身器啫，否則相信一如有啲網民話，管理呢個fb賬戶嘅肯肯定唔係鬍鬚曾本人囉。
揸自拍神器合照
而喺晚上出席完電視論壇後，鬍鬚曾即時用自拍神器同幾位記者一齊影相，上載fb開心share之餘，仲留言話：「練得劍多，先拎得咁定」，即時呃到好多市民like。政府新聞網噚日嘅同事，似乎亦好like鬍鬚曾結語「渴望心中富有」一段，喺fb出文分享咗一句「渴望是心中富有，名和利不刻意追求」嘅徐小鳳《隨想曲》歌詞幫手hard sell預算案。連市民同公務員都冧掂，鬍鬚曾點會唔獲阿爺欽點？
李八方
mailto:[email protected]
