一年前，當財爺曾俊華喺立法會宣讀預算案嘅時候，民主黨鐵頭仁何俊仁見悶悶地，又唔想好似其他議員咁，俾記者發現佢「釣魚」，所以拎咗部iPad出嚟睇性感索女相，為自己提一提神，仲睇得津津有味，經此一役，佢多咗個花名叫做AV仁，當日嘅風頭仲勁過曾俊華。
事隔一年，同一個地方、同一嘅場合，仁哥終於修心養性。乖乖哋坐定定。噚日鬍鬚曾宣讀嘅預算案，大部份之前都放晒風，論吸睛度同上年不相伯仲，但仁哥應該知道自己會俾人𥄫到實，明白人類不應該重複同樣的錯誤，所以佢不單止無拎部iPad出嚟、連電話都好少㩒，頂多望過幾眼，其餘時間都係坐喺度全神貫注聽財爺講嘢，間唔中喺紙上寫吓嘢，唔知係咪抄筆記。呢啲咪叫經一事、長一智囉。