新民黨主席葉劉淑儀被舞麒麟撞過後，連日幾乎被政界中人抽乾水，好在佢都好識趣，噚日親自去到沙田鄉事委員會，同唔小心撞親佢嘅舞麒麟師傅，握握手做個好朋友。葉劉話呀，席間大家都係閒話家常，覺得謝師傅唔使道歉，仲封咗五百蚊大利是畀佢，大讚對方好結實㖭。此行收穫係，舞親麒麟都唔好企喺附近三個身位。葉劉強調唔信邪，反讚麒麟係吉祥神獸，引述沙田鄉委會話喎，明年一定正式邀請佢出席車公廟求籤活動。八方噚日見葉劉喺財爺宣讀預算案期間，封緊五百蚊利是，唔知係咪嗰一封？
日前飲麒麟啤贈興嘅自由黨張宇人，路過時乘機扮麒麟撞葉劉，葉劉即時反擊張宇人：「你揩油呀，衰鬼！」仲話唔係個個被撞都見到報㗎。肉地夠厚嘅張宇人就話自己嘅油多過葉劉啦，使乜去揩？