「無撚糸」，其實好有用。費清唔係新年流流講粗口，只係分享吓購物經驗。新春期間，走咗去UNY買嘢，去到佢哋十二蚊店「私秆生活」，諗住買條毛巾，就見到啲日文寫住無撚糸嘅毛巾。
可能店員見費清一臉疑惑，又攞手機影相，就主動解釋話，無撚糸係日本用語，係一種編織方法。佢話一般編織係將幾條棉線搓扭埋一齊，再編織成布、毛巾等，但無撚糸就係冇經過搓扭，直接用棉線編織。因為冇經過搓扭，保留咗棉啲柔軟質感，而且棉線鬆散啲、之間空間較大，所以吸水力好啲。
見佢識背咁滯，可能唔少人都好好奇。不過，可能因為冇經過搓扭，費清覺得啲毛巾比較容易變形。
#仲有「強撚糸」
同事阿川話費清孤陋寡聞，網上好多人講過無撚糸，而且日本仲有「強撚糸」㖭，相反係由多條棉線搓扭而成，所以好硬淨，冇咁易變形。
其實，黑貓又好，白貓又好，捉到老鼠就好貓，毛巾都係同一道理。
費清 ＃要生計，也要生活 ＃毋忘初衷