全人類生日嘅人日，連政務司司長林鄭月娥都有大禮收。林鄭噚日趁政改第二階段諮詢接近尾聲，聽完財爺公佈新一份財政預算案後，即刻出席福建社團聯會新春團拜做主禮嘉賓。佢致辭時三句唔埋都提起政改，話第二階段政改諮詢仲有個幾星期就完結；既然去到福建幫地頭，佢特別以閩南名曲《愛拼才會贏》作為比喻，話希望大家不畏艱辛、全力以赴，落實一人一票普選特首，如果佢即席唱兩嘴，八方覺得更Perfect囉。
福建社團聯會見林鄭咁識做，即刻禮尚往來送大禮，聯會主席吳良好送出三千三百份政改意見書；作為愛國愛港社團，林鄭唔使睇都知，一定係力撐啦，所以佢拎住叠意見書影完張合照後無耐，趕時間走先，而佢離開之後，成叠意見書放咗喺台邊，唔知係咪稍後先攞番。