吳千語今年拍完賀歲片，再去拍劇拼搏。只是，她除了年輕靚女，最為人知的「成就」，至今仍是跟年齡相差十四載的林峯拍拖。外表柔弱、只有一百磅的吳千語，男友愛到掌上明珠一樣，她卻自評有80%是男生思維，不懂撒嬌不會嗲人，哭哭鬧鬧更加咪搞，「我唔鍾意製造問題。」不製造問題的女人，可能才是好命的女人。
撰文：林妙萍
攝影：郭賢興
造型：鄧卓嶽
化妝：Zoe Fan
髮型：Jo Lam of Queen's Pi
服裝提供：I.T
今年結婚的多對圈中情侶，周杰倫和昆凌相差十四年、吳奇隆和劉詩詩也相差十七年，引發了right timing比right girl更緊要的話題討論。
從未喊過
二十一歲的吳千語和三十五歲的林峯，相差十四年，公開拍了兩三年拖，何時結婚？「近期啱啱都有呢個差異，其實我哋心智年齡差唔多，冇太大衝突；𠵱家我哋各自有achieve，唔急，希望細水長流，大家仲好後生。」拍拖以來，絕少嘈交，也沒為感情事哭過，「可能因為我唔鍾意製造麻煩，又唔鍾意嘈交，既然兩個人喺埋一齊，就要好好相處，有乜事大家拎出嚟講，講道理囉。人做錯事一定要認，無論係邊個，我唔係嗰種我做錯咗，但都要男朋友𠱁、唔合理嘅女仔。」千語今年會再拍電視劇，男友林峯曾是視帝，千語則沒講明不會向男友請教。
千語早前客串賀歲片《浮華宴》，飾演有公主病的豪門千金，非常自我中心，她最記得其中一場喊戲，「因為是笑片，所以要好浮誇咁演，咁喊嘅時候又要好自然咁喊出嚟，但又要有笑片效果，真係好難平衡，NG咗十次八次。」又笑又喊考演技，更難是她原來從不是個有眼淚的女仔。
千語BB說：「我唔係易喊嘅人，但有三大死穴，就係：小朋友、老人家同狗仔，講狗仔嘅戲，睇親都會喊。」周迅之前的《撒嬌女人最好命》，引發中港台三地一片撒嬌熱，千語BB看來嬌柔，卻自問不識嗲人，更不是嗲聲嗲氣，死不認錯等人𠱁的港女，「我唔識撒嬌，唔識嗲人，我性格似男仔多啲，男仔朋友話我80%係男仔，得20%係女仔，嗰20%可能係外觀上，總之我諗嘢、思維方式都係男仔。」
最怕走光
每次和千語BB影相，都發覺她手腳纖幼，骨架細、身形如紙薄，「我有一百磅㗎，一百磅多少少啦！不過，都係偏輕咗啲，健身教練話瘦嘅人唔代表冇力呀！」直認身體一般，年頭又腸胃炎，「我食極唔消化，同埋唔肥可能同我唔鍾意食零食有關，我鍾意食飯、米粉、生果蔬菜，肉就麻麻。」現時跟教練做重量訓練及拉筋運動，一周兩次，希望改善體質。瘦人有瘦人着數，穿衣完全不用考慮衣料材質、顏色，「冬天好黑白灰，春天想買反光物料，同埋好多color，好似粉色、綠色、橙色嘅衫。我好怕走光，生活上好少着裙，鍾意着褲方便啲。」
【千語BB育成】
三歲定八十。二十一歲的吳千語，現在大眼妹的樣子，跟小時一模一樣。她曾經受訪透露家中是慈父嚴母組合，童年時的千語BB也試過百厭貪玩惹禍，八歲時游水被割傷大腿留疤。父母對這個獨生女非常着緊，十四歲才准她獨自搭地鐵，十七歲接觸男性，不過十九歲和林峯拍拖，火速帶男友見家長令父母安心。
更多精采時尚內容，盡在 http://add.appledaily.com。