曾俊華喺新一份預算案，少有地用咗喺中國傳統代表尊貴嘅紫色做主調，除咗鬍鬚曾自己打番條紫、黑色斜紋呔捧自己場，連佢老婆曾黃蓮華亦同老公襯到絕。曾太噚日着咗件同預算案色調一模一樣嘅紫色衫去立法會公眾席，坐定定聽老公講解派糖大計，而財爺阿仔、新抱同阿女，都一齊坐喺公眾席第二排專心聽書。八方仲見到，唔少商會阿頭都有去到立法會聽預算案，可能因為預算案對受佔領影響商戶有糖派，要即時了解。
而噚日十二位局長中，由財爺直接管轄嘅商經局局長蘇錦樑、財庫局局長陳家強，仲有唔係由財爺管嘅政制及內地事務局局長譚志源，不約而同打咗條紫色呔，反而聽梁振英話多過財爺話嘅發展局局長陳茂波，就只係打咗紅色呔。到底有乜嘢含意？