嚟緊一段時間，唔少政府諮詢委員會嘅阿頭都要換人，好似青年事務委員會咁吖，現屆主席陳振彬因為做咗足足六年，根據政府「六六規定」，即係委任唔應該多過六個、一個位唔應該坐多過六年，陳振彬就算幾獲梁振英歡心，都係時候要走人，所以之前佢入咗可持續發展委員會成為新委員，算係一換一嘅安排啦。
政界對於邊個接主席棒，議論紛紛；花生友聽聞，未來主席人選有可能係富二代，不過就絕對唔係早前傳過嘅霍啟剛。知情人士話喎，雖則啟剛係委員有優勢，但佢太年輕了、兼且亦太紅，可能都未係時候上位。最近又有另一個名彈出，就係施子清嘅四公子施榮忻，但花生友相信機會唔大，正如施榮忻回覆，政府至今都未搵過佢喎，而佢亦自覺未係時候接棒，謙稱要再浸吓，笑笑口話多謝有人睇好佢。
又唔係佢，仲有邊個呢？花生友聽聞，華人置業主席劉鳴煒原本係熱選，但最近突爆卡羅琳醫學院捐款風波，相信唔適宜喺呢個時候委以重任。此時有位黑馬忽然冒起，剛卸任香港青年聯會主席嘅葉振都據說隨時爆冷跑出。花生友都問過現任委員施榮忻，點睇下屆主席人選？佢點名指同為委員嘅青協副總幹事馮丹媚好適合，有經驗又有歷練，唔知梁振英，最終會向邊位點燈？
花生友