年初七仲係新正頭，唔少女議員好似新民黨葉劉淑儀、民建聯蔣麗芸以及經民聯梁美芬等，噚日去立法會聽預算案時都應節着到紅噹噹或七彩繽紛，各自鬥搶鏡，但極大機會接任民建聯主席嘅李慧琼（Starry）卻好低調，一件黑色衫配杏色西裝外套，路過都冇乜人發現。
不過，八方喺預算案之後，由立法會趕去福建社團新春團拜活動，卻見到Starry變裝，突然由朝早嘅沉色換上桃紅色小鳳仙，佢嘅黨友鍾樹根都大讚佢高䠷身形着得好睇。點解喺立法會唔着呢件新年戰衣？Starry怕怕醜咁話，返立法會着成咁有少少唔好意思，所以寧願開完會變身。既然就快做民記女當家，Starry係時候要高調一下。