今年賀歲檔期上映電影競爭激烈，幾天春節假期後，票房亦開始回落啦！為咗催谷票房，幾部賀歲片都開始諗計再吸引觀眾入場，好似《衝上雲霄》噚晚搞慶功宴沖喜，《12金鴨》就搞咗個加長版，搵嚟彭于晏（Eddie）客串一個鏡頭，部戲裏面原本搵佢嚟搞笑，話盧海鵬扮嘅老鴨改咗個名叫鵬于晏，結果大受女士歡迎，而加長版就搵咗真人彭于晏嚟客串，今日喺戲院就可以睇到。
客串兩粒鐘
Eddie喺上海拍緊戲，原本冇時間客串，但君如好努力去游說，又唔介意專程飛去上海拍攝，搞到Eddie都唔好意思拒絕，抽出兩粒鐘幫套戲客串，拍攝時，君如一見到Eddie就老實唔客氣摸佢胸部，之後兩個人又連環擺甫士鬥Chok自拍，工未開已經玩到好熟絡，戲入面佢同君如會有一齊跳舞場面，事後Eddie話：「可以同君如姐合作好開心，希望大家會喜歡這個甜品彩蛋。」而君如都好感激各方友好嚟幫忙客串，同時答謝觀眾一直以嚟對佢嘅支持，佢決定提早喺美國返香港，搵埋戲中演員一齊入戲院謝票。
撰文：馮仁昭