新正頭旺明星家屬，繼楊千嬅奶奶黃淑貞初三頭場勝出「野孩子」後，呢晚谷草第二場四班一千米又開呢瓣，鄭中基阿媽馮元璋名下之「星星星」第二次出賽，由柏寶發難成功，爆28倍綠燈W開齋，老馬「金紫荊」相飲恨做二奶，落飛黨重注呢隻啡燈W失手，但就中重124倍啡燈Q補數。三、四名分別係「勇戰」同「駕聖」。
講番「星星星」，馬主馮元璋之前養過「搖滾雄豐」、「搖滾新星」及四捷馬「愛得威」，佢老公亦即係鄭中基老竇鄭東漢，有本地搖滾之父稱號。這場徐廐九歲老馬「金紫荊」受到落飛黨睇中，臨場着啡燈，獨贏由20倍過外賭至10倍開跑，此駒末段一度係威係勢，看似追越柏寶座騎「星星星」，影相亦看似「金紫荊」影贏，但原來步步贏一步輸，決勝圖偏偏要放到很大，才顯示「星星星」贏一條線，可謂極之驚險。
當柏寶知道「星星星」影贏後，從鞍上跳下來與練馬師蘇偉賢相擁慶祝，猶如贏大賽般興奮；而鄭東漢有到場拉頭馬，最近再為人父的鄭中基，則沒有出現。
鄭東漢賽後指他以為「星星星」輸了，他說此馬是由他親自挑選來港，狀態比上仗好，但未算是好弗，沒有想過可勝出。
蘇偉賢指他和柏寶亦以為「星星星」輸了，因此得知賽果後十分激動，練者指「星星星」是有能力的馬，亦有一檔之助，賽前擔心牠會如試閘般快斷，結果有前有後，看來一千及千二米均合。