咪睇小華將唔識數糊，第一、第七場呂卓賢及梁家俊先後贏完，第八場三班千二米，輪到大師兄鄭雨滇發威，佢騎徐廐29倍冷門「振興中華」中段發力狂搶走甩，就此奠定勝局，擊敗亞軍馬阿叻陳百祥與黃杏秀的愛駒「如虎添翼」，季軍是141倍全場最冷之「陀飛輪」，「振興中華」捧走埋義勇軍挑戰盃，阿滇一洗已守齋五個月之頹風，自2013年5月11日「得盛」贏李福深盃後，相隔近兩年才再度捧盃。
有人歡喜有人愁，方嘉柏今場出「薑餅人」被捧成2.9倍大熱，適逢馬主馮柏基太太Icy黃婉曼這天31歲生日，個個諗住Icy可以雙喜臨門拉頭馬。點知「薑餅人」虎頭蛇尾，拉士力歇連第四名都保唔住，畀半冷門「福嘉皇」搶去第四名，「薑餅人」只得第五。三重彩派10萬元已驚人，四重彩更杰撻撻，十蚊注派到104萬破紀錄，新馬仔話齋「冷得我騰騰震」！