唔少市民新春期間外遊，而當特首梁振英被影到去咗馬爾代夫、曬到成個黑人咁返香港後，有市民則喺年初五喺日本東京羽田機場候機室，發現前特首曾蔭權同佢太太嘅行蹤，只見煲呔頭耷耷玩手機，似是心事重重。
讀者吳先生話喺年初五朝早九點幾，喺羽田機場貴賓候機室等候搭國泰航機返港，意外發現煲呔夫婦，佢哋坐沙發互對，身旁各有一個行李篋。當時曾太睇緊報紙，煲呔則時而托頭、時而頭耷耷玩手機，夫婦冇乜溝通。讀者吳先生一度上前同煲呔打招呼，講早晨，佢話煲呔目無表情回應「早晨」。
到咗登機時間，由於行去登機閘約需四分鐘步程，吳先生話煲呔夫婦拖住行李篋，一支箭衝往登機閘。吳先生隨後進入商務客位，未見煲呔夫婦，估計佢哋搭頭等。