港台噚日新春團拜搞搞新意思，喺巨型LED螢幕前面玩「電子鳴鑼儀式」，先由廣播處處長鄧忍光「畫」個鑼出嚟，再由主禮嘅商經局局長蘇錦樑「敲響」。雖然大家都知係做吓樣，但見到鄧忍光揸住支筆求其點咗一吓就有嘢睇，在場唔少人都忍唔住「嘩」出聲。
鄧忍光致辭話，港台來年會起廿二個補點發射站，將數碼電視訊號覆蓋到99%嘅人口，又會全面更新港台新聞網站，港台上下會按港台約章，用專業精神繼續服務市民。之但係處長喺團拜一完，轉個頭就唔見咗人，冇理到等住發問嘅記者，只係叫助手派利是。
噚日活動請咗十三個電子媒體代表出席，但唔見舊年開台嘅香港電視。港台公關回應話，名單係按有冇廣播牌照擬定，港視身份尷尬，所以港台冇發邀請。