特區政府噚日宣佈，中央政策組前全職顧問何燕飛離職後，獲准自僱形式工作。查實何燕飛係喺二○一二年底獲任為中策組全職顧問，之前曾經任職公營及私營機構，包括金融管理局同美林。原來佢喺去年十一月十五日離職後，向政府申請居家就業，擬向客戶提供金融、經濟同產業方面嘅分析。
前任行政長官及政治委任官員離職後工作諮詢委員會審視過何燕飛嘅個案，認為佢今次申請嘅自僱安排，唔會構成任何潛在嘅利益衝突、亦唔預期會引起負面公眾反應或公眾觀感喎。基於委員會嘅建議，政府亦開綠燈，喺何燕飛須遵守相關規限嘅前提下，批准佢離職後嘅自僱工作申請。