練馬師賀賢，可說是羅理雅的主要支持者之一，季內羅理雅有三匹頭馬「奪金」、「綠野仙踪」及「寶成福星」 出自賀賢馬房，可見這對澳洲騎練關係良好。
今期(25日)谷草賽事，羅理雅有一匹賀廐座騎「真先生」列陣第六場三班1200米，此駒雖然來港後七戰零獎金，但大部份輸得不遠，而且本身是愛爾蘭1400米三級賽盟主，有一定級數，當然不可過早睇低。事實上，馬兒亦有搏殺動靜，今朝(24日)賀賢踩單車返馬房途中遇著羅理雅，即截住他密斟，兩人隔住一條欄，賀賢喋喋不休，羅理雅則伏低頭仔細聆聽，彼此遲遲才散去，賀賢明顯在向羅理雅教路如何發揮「真先生」，動靜緊張。
「真先生」本月中試谷草大閘，直路受催策下反應不俗，後上第四只輸一身位，表現甚佳，北半球馬已開始適應水士冒勇，今仗對手唔算太強，這匹冷門馬正係出擊好時機。